Vorehei turløype

Den spennande vaktheia!

Vorehei er eit fjell (443 moh.) vest for Otra ved Moisund i Evje og Hornnes. Fjellet er eit mykje populært turmål for både Moisund-folk og andre turgåarar.  Det er ein kjempefin tur for familiar!

Vetehei?

Frå oppstiginga mot Vorehei. Foto: Geir Daasvatn

Namnet tyder «Vaktheia». Mykje taler for at det har vore ein varde – ein vete – på Vorehei. Veten var ledd i ein signalkjede av bål som låg på punkter der ein kunne sjå frå den eine til den andre. Om det var vete på Ropstadknuten i Hægeland i sør, kunne ein sjå han frå Vorehei. Mot nord ser ein til to mogelege vetefjell, Gjengninghei og Årdalsknapen. Årdalsknapen er eit sikkert «vetefjell». Det skal ha vore synlege leivningar etter ei vetestue på Vorehei så seint som etter 1900.

Den vesle tjønna rett før du svingar opp på sjølve toppen av Vorehei. Er du på tur med kjærasten og borna, er dette ein nydeleg stad å ta ein stopp og ete nistematen. Foto: Geir Daasvatn

«Røysa»

Lokale folk kallar toppen av Vorehei for «Røysa». Det er tydelege merke etter ei åsrøys på toppen. Ho må vere svært gamal. Men arkeologane er forsiktige med å tidfeste slike åsrøyser. «Alt frå bronsealder til vikingtid», meiner dei.

Korleis kome dit

Du kan parkere ved Moisund bedehus. Herfra kan du følge traktorveg mot sør-vest til foten av heia. Så langt er løypa temmeleg flat. Det går merka sti vidare, med ganske jamn stigning oppover i terrenget. Turen går langs ei slukt nokså direkte opp mot toppen av heia. Når du kjem til tjernet oppå heia, skal du dreie nordover og opp til toppunktet ved varden. Fleire stader på turen kan du få ein fin utsikt utover mot Hodne eller i meir nordleg retning mot Moisund.

Lengda på turen fram og tilbake er rundt 5,1 km. Berekna tidsbruk kan vere 2-3 timar, eller litt meir om du og familien tek ein matpause før de tek fatt på heimvegen.

Kjelder:

  • Setesdalswiki
  • «Turløyper i Setesdal», brosjyre utgjeve av Visit Setesdal, 2018

Lenker:

Vorehei turløype starter på fin traktorveg rett sør for Moisund bedehus. Foto: Geir Daasvatn

 

Hei. Lurer du på noe?

Send
ei melding, så hører du fra oss!